lunes, 27 de julio de 2015

Los puebros de Cabreira Alta recuperan los sous ñomes tradicionales

L’Ayuntamientu de Trueitas, en Cabreira (Llión), acaba de fincar carteles billingües pa la señalización de las direcciones y la entrada de los llugares d’esti conceyu, nos que’l ñome tradicional está al par del oficial y alministrativu siempre qu’entre unu y outru existan diferencias. El Teixu, Rede pal Estudiu y Defensa de la Llingua Asturllionesa colaboróu cono gobiernu municipal poniendo a la súa disposición los topónimos tradicionales cabreireses recoyieos por esta asociación en distintas encuestas. Esta yía la primeira vez que s’instala señalización viaria billingüe en Llión, algo que yá yía habitual n’Asturias y en Miranda del Douru.



Vayellu, Quintaniella, Trueitas, Truitiellas, Valdaviéu y Villarinu facen por primeira vez aparición na señalización oficial de carreteiras, d’onde estaban ausentes a pesar de ser los ñomes tradicionales y n’usu pa mueitos cabreireses. En concreto, l’Ayuntamientu de Trueitas instalóu frechas d’intersección y carteles d’entrada a los puebros nos qu’aparez primeiro’l ñome oficial castellanizáu y, a continuación, el topónimu tradicional, cono mesmu tipu de lletra y la mesma visibilidá.

El Teixu, que colaboróu asesorando al gobiernu municipal nas formas correctas de los topónimos tradicionales, quier felicitar al Ayuntamientu de Trueitas por dar un pasu tan importante na recuperación y dignificación de la toponimia cabreiresa. Los topónimos tradicionales representan una amuestra más de la cultura d’esti conceyu, expresada n’asturllionés, y son un tesouru que yía necesario defender y promover. La súa utilización oficial, al par de los ñomes deturpaos oficiales, yía un pasu alantre mui importante pa la normalización y recuperación del asturllionés en Llión, al tiempu que demuestra a outras alministraciones que  l’usu d’esta llengua (reconecida y teóricamente protexida pol estatutu d’autonomía) yía posible cuando existe voluntá política.



La lista de ñomes de llugar cabreireses qu’El Teixu apurriéu al Ayuntamientu de Trueitas yía frueitu del trabayu de recoyida de la toponimia mayor de las provincias de Llión y Zamora, un llabor al qu’esta asociación lleva dedicada casimente díaz años. A través d’entrevistas de tipu llingüísticu a personas que conocen el territoriu y mantienen las distintas falas d’estas provincias, El Teixu quier recuperar y reivindicar la toponimia más maltratada pola nomenclatura oficial, cumo yía la de las entidades de pobración. El resultáu d’esti trabayu yía una base de datos que yá cubre buena parte de Llión y Zamora, y qu’El Teixu ta poniendo a disposición de distintas alministraciones y proxectos normalizadores.